رواية انت غرامي وجنوني - الجزء الثامن عشر

رواية انت غرامي وجنوني - الجزء الثامن عشر 

الجزء الثامن .. عشر

مر الاسبوع الثالث ومافي أي تغير بحالتها للحين جثه بلا حراك بس
يالي طمني انهم شالو الاجهزة عنها.. صارت تتنفس من حالها من دون
أي مساعده... واللفه يالي ع راسها انشالت والجرح بدى يبرى....
لكن الهزل والضعف .. مستمر والمغذي مازال ع يدها يالي عروقها
برزت وصارت زرقا بسببه...تنهدت ..وجلست جنبها وحطيت يدي ع
راسها وصرت اقر من يالي احفظه من القران... والدعيه وانفخ عليها
اليوم جات مشاعل معي .. وتركتها هي ومشعل ..ورحت اجيب شئ
ناكل .. تفاجات بااتصالها ..خفت انه يكون فيها شئ .. او برغد .. صارت
الافكار توديني وتجيبني...تركت كل يالي بيدي ودخلت بسرعه ع الغرفه
شفت مشاعل ودموعها ع وجهها .. قلبي انقبض.. وجمدت مكاني.. كان
اطلع.. ماابي اسمع الخبر... خلاص ..مااقدر اتحمل .. طول الوقت هذا
وانا ادعي القوة.. وانا حيل مكسور.. واي هزة تقضي علي.. ماابي
اسمع خبر فقدانها ماضنيت قلبي يتحمله.. جيت بطلع ووجهي بان.. الحزن
والضيق فيه الا .. حسيت بحبل الامل ارتمى ثاني .. ورجعني للحياة من
جديد..
مشاعل" بدموع الفرح": ابشرك ياسعود..
سعود" لفيت.. وبلا شعور.. وماقدرت اداري دمعتي..يالي نزلت من ضن
فرقها..": وش
مشاعل: الدكتور يقول انها بدت تسترجع ..قوتها.. وبدت تحس بالي حولها
سعود" مو فاهم كلامها .. بس كل يالي قدرت استوعبه انها ماماتت..للحين
عايشه.. للحين معي مااتركتني..": وشلوون
مشاعل: كنت اسولف عليها واقول لها كيف حنا مشتاقين لها وبنتها مشتاقه
وبين سوالفي وانا ماسكتن يدها الا تضغط ع يدي . ضنيتها حركه عاديه
مثل يالي قبل.. بس كملت ضغط.. هالمره فز قلبي وحسيت انها مو مثل
كل مره قلت لها.. رغد تسمعيني.. اذا تسمعيني اضغطي ع يدي
سعود" باامل كبير": وش صار
مشاعل" تحضنه": ضغطت ع يدي وناديت الدكتور وكشف عليها وقال
انها بدت تستفيق من الغيبوبه .. كلها يومين بالكثير وهي صاحيه
سعود" بعدم تصديق": من جدتس .. ماتكذبين على
مشاعل" هزها حال اخوها .. وشلون فرحته وعدم تصديقه بالي يسمعه":
أي من جدي ياعين ابوي انت روح الطبيب برا تاكد منه
سعود" من غير مايناظرني .. طلع للطبيب وشافه وقال نفس يالي قلت
له .. وع طول شفته دخل ع المصلى....
سعود" بعد الاخبار الطيبه هذي.. والامل يالي ربي رجعه لي.. رحت
صليت.. ركعتين شكر.. وسجدت لربي .. وانا احمده واشكره انه ماخيب
رجاي.. ومارد دعواتي له ..

اتصلت ع عمي وعمتي.. هم عندنا بالقصيم .. من طاحت رغد.. بشرتهم
بالي قاله الطبيب... وجاو ع السريع عشان يشوفونها...
سعود" دخلت ..شفت مشاعل نايمه... مشيت لعنده رغد.. وسكرت الستارة
علينا.. جلست جنبها...ومسكت يدها وصرت اتاملها....بست جبينها
وبصوت واطي": يالله اصحي وبسك كسل... نوري دنيتي بضيا عيونك
وصدى صوتك... ابي اشوف بسمتك.. يالي من اشوفها هزت كياني
واسعدتني... اصحي... ماكفاك هجر لنا... مااشتقتي لنا...

رغد" هالصوت مهوب غريب على .. بس ماني قادرة اتذكر مين ...حسيت
بدفا صوتها وهو يكلمني...حاولت افتح عيوني.. بس ماقويت... احس راسي
ثقيل... وريقي ناااشف بالحييل... "وبصعوبه": ا..بي.. مويه
سعود" فزيت من مكاني... مو مستوعب يالي صار...معقوله الي اسمعه
ولا يتهئ لي من الفرحه... رجعت وقربت ثاني لها ": رغد انتي صحيتي
رغد" حسيت يوم احاول اتكلم حلقي يتجرح من الجفاف...ماقدرت ارجع
اتكلم ثاني... حاولت افتح عيوني...وبصعوبه..قدرت افتحها بشويش..
وجعني النور القوي...ورجعت غمضتها ثاني...بعدها .. حاولت افتحها
ببطئ اكثر.. دمعت عيوني.. من الهوا يالي لفحها..عقدت حواجبي
وفتحتهم.. كانت الرؤيه عندي مشوشه وضباب...فتحت عيوني وسكرتها
كذا مره.. بعد المره السادسه تقريبا صارت توضح عندي...وجعتني
عيوني...ناظرت المكان وماني عارفته... لفيت بنظري.. وخفت..
":.......................................
سعود" كنت اظن انه صوتها يالي طلع بس.. يوم قربت منها شفتها تحاول
تتكلم ثاني.. وتجاهد عشان تنطق.. بس هدت بعدها ملامحها...جلست
بخيبة امل...الا انتبه لحركه عيونها المستمرة..فزيت وكلي امل مره ثانيه
ووقفت عند راسها.. شفت عيونها وهي تحاول تفتحها..بالوقت عرفت
وتاكدت وحمدت ربي وشكرته انها صحت..جيت ابروح انادي الطبيب
بس ..وقفت ابي اشوف عيونها وحشتني .. نظرتها بكل مافيها من عناد
كره شموخ.. عزة نفس..وحنيتها مع الكل ماعداي....واخيرااا فتحت عيونها
كانت تدمع.. وهذا شئ طبيعي من بعد نومتها.. الطويله... وصارت ترمش
فيهم.. لحد ماقدرت تفتحها...نورت دنيتي..بضيا عيونها...":
رغد" انفجعت .. من يالي واقف قدامي... ماعرفته.. وحاولت اصرخ
ماقدرت ... وجعني حلقي.. وماقدرت اقوم.. جسمي مكسر...":......
سعود" استغربت من نظرتها.. والخوف يالي ملاها.. قربت منها حاول
اهديها.. لفت راسها بسرعه .. وصارت تصيح بصمت... مهيب قادرة
تطلع صوت.. حز بخاطري.. للدرجه هذي تكرهيني...حتى يوم صحيتي
وكنت اتمنى اكون اول انسان تشوفينه.. تشوفين شوقي وانتظاري لك ..
مديت يدي ..بمسك يدها احاول اهديها...الا شفتها تزيد بالبكي..كرهتك
ياسعود.. ماهي طايقه قربك ولا لمستك من بعد هالغياب .. وش منتظر
يعني.. وش بيغير الحال...ماتغير شئ..بينا وهي مهيب عارفه..وش صار
بفراقها...بعدت عنها ..وكلي الم بقلبي... من صدها لي.. عرفت انه صحيتها
هي .. موعد الفراق صدق....... رحت لمشاعل..وبصوت هامس":مشااعل
مشاعل:.......................
سعود" هزيت كتفها": مشااعل
مشاعل" انتبهت": سم اخوي بغيت شئ
سعود" ماكان فيني حيل اتكلم.. اشرت لها بيدي":..................
مشاعل" فزت من مكانها يوم شافتها.. طارت لعندها وبدموع فرح وعدم
تصديق... انها صحت":اخيرا اخيرا مابغيتي تصحين ياشيييخه
" حضنتها... بس لفت انتباهي.. رده فعلها نفس ردة الفعل... يالي قابلتني
فيها... حتى مشاعل يارغد منتي طايقتها.. ضحكت بداخلي... من كرهها
لي كرهت اهلي شكلها... طلعت انادي الطبيب .. الا واشوف عمي وعمتي
مقبلين......
ابو رائد: بشرني ياابوك وشلونها الحين
سعود" احاول اخفى الالم يالي بقلبي": ابشرك ياعم.. رغد صحت
وانا رايح انادي الطبيب .. يجي يشوفها ويطمنا عليها
ام رئد" ماانتظرتني اكمل جملتي الا طيران ع غرفت بنتها.... ابو رائد
انتظر برا الغرفه... لحد مارحت وجيت بالطبيب لانه مشاعل فيه... دخلت
من بعد ماطلبت منهم يتغطون...دخلنا ..الا انصدمت ..بردة فعلها ...انهبلت
حتى امها خايفه منها .. ومهيب راضيه لها تقرب منها...لفيت ع الطبيب
سعود"وانا عاقد حواجبي ومستغرب من ردة فعلها": دكتور وش السالفه
الدكتور" نادى النرس... ": والله ماني عارف..."قرب منها .. ونفس
نظرة الخوف... والدموع... يعني مب بس انا وش السالفه"
سعود" حاولت امسك اعصابي ومااصرخ...": وش فيها يادكتور ..ليه
تسوي كذا
رغد" انتبهت لصوته... هو الصوت يالي سمعته ..الصوت الدافي..الحنون
يالي حسيت بقربه لقلبي...رفعت نظري له ...مدري ليه حسيت هو الوحيد
الي حسيت بالراح له.. كل يالي حولي ماني عارفتهم...رفعت يدي ااشر له
"بمعنى ..تعال.. انت الوحيد يالي بحس بالراحه له".....
سعود"نظرتها غير ... مهيب خوف ولا كره.. نظرة تناديني فيها.. معقوله
يالي اشوفه.. بعدها نفضت هالفكرة... انا اخر انسان ..ممكن تسويها معه
لكن.. يوم شفت يدها تاشر على...ماقدرت ومن غير شعور رحت لها
ع طول...":........................
رغد"شفته قرب مني.. وبصعوبه شلت نفسي ..وتمسكت بثوبه..ودفنت
راسي فيه .. وصرت ابكي...هو جلس جنبي بالسرير ..وحضني...ما
قاومت.. حسيت بدفا وامان مهب طبيعي....حسيت براحه..مع اني ماني
عارفته...":................
سعود" حسيت روحي ردت لي من بعد مادفنت نفسها بحضني...حضنتها
بقوة لعندي خايف ..تضيع مني.. خايف انها تنتبه .. وتبعدني ثاني عنها
وبحنيه ": الف الحمدالله ع سلامتك يارغد... كذا تخوفينا عليك...شوفي
امك وشلون متقطعه بكي عليتس.. وناظري ابوتس بعد
رغد" صوته.. حنيته.. خلتني ادفن راسي بصدره اكثر... بس استغربت
يوم قال.. امك .. ابوك... مين هذول..رفعت نظر اشوفهم ثاني..بس ما
عرفتهم...وش يقول هذا .. انا اول مره اشوفهم بحياتي...واستغربت
يوم ناداني باسم رغد.." رفعت نظري له .. وحسيتا ني مااشوف شئ
من دموعي يالي كانها ضباب...وبصعوبه":م...مين.. رغد
سعود"تجمدت بمكاني.. وش يعني كلامها.. رفعت نظري للطبيب
وكل وعلامات الاستفهام .. والاسئله بوجهي.": دكتور

الدكتور" قرب من عندها يبي يكشف عليها.. بس خافت والصقت فيني
اكثر وتمسكت بكل قوتها.. يالي كانت ..مثل الطفل ومافيها حيل..من
شدة ضعفها...":ممكن تبعد شوي استاذ سعود
سعود" جيت بقوم.. تمسكت اكثررر..ماقدرت ابعد عنها.. ودي شلتها
ودخلتها بداخلي.. ولا اشوف نظرة الخوف بعيونها.. حسيت بنشوة
مهيب طبيعيه .. يوم مارمت نفسها الا بحضني.. عافت الكل..امها
ابوها ..حتى مشاعل.. ومابغت الا انا...مسحت ع راسها وبحنيه":رغد
لاتخافين انا معتس.. ماني قايم.. بس الطبيب يبي يكشف عليتس
عشان يطمنا ..طيب
رغد"تصيح..ودافنا راسها بحضني":.................
سعود" رفعت وجهها الاصفر الذبلان..بيدي ومسحت دموعها..وبحنيه
": لا تخافين انا معتس.. امسكي يدي.. ماراح ابعد عنتس.. بس نبي
نطمن ..طيب
رغد"هزيت راسي.. طول ماهو قربي.. احس بالامان...سكت ..وبعدت
عن حضنه.. وماودي ابعد ابعد..كنت ماسكه يده ..وكانها طوق نجاة
للغرقان..قرب من الطبيب.. وصار يكشف على.. بعدها صار يسالني
اساله .. وماجاوبته...":................
سعود: ردي ع الطبيب..
رغد" ماقدرت ريقي ناشف.. وحلقي ..يوجعني.. اشرت له ع حلقي..بس
مافهم.. بس الطبيب راح جا مويه ومدها لي.. انا بعدت عنه خايفه..":...
الدكتور" يلف ع سعود": عطها هالمويه .. حلقها جاف.. وماراح تقدر
تتكلم بسهوله..
سعود" اخذت الكاسه منه.. وقربت منها .. وهي مابعدت..حسيت بكل
السعادة.. الراحه..والاحساس.. الي ملكني.. باني احميها من كل شئ..
هي مارضت بقرب حد غيري.. ماارتحت الا لقربي..وعافت الكل..الا
انا.. مو قادر اوصف شعوري ولا احساسي... شعور فوق الوصف..
جلست جنبها.. وقربت الكاسه من فمها ...وهي مابعدت ..شربتها
بالبدايه صارت تكح... وبان الوجع بوجهها..رجعت قربت المويه لفمها
وهي كملت تشرب.. بصعوبه..": خلاص
رغد" حسيت الالم خف شوي... بس بالبدايه وجعني حييل...من جفافه
شربت كفايتي.. واشرت له براسي بمعنى ايه":...........
سعود.."يناظرني بحنيه ..حبيتها.. وماودي نزل عيونه يوم اشر ع الطبيب"
:رغد جاوبي ع الطبيب.. طيب
رغد"وبصوت مبحوح": لاتروح
سعود"كلمتها زلزلت كياني":ماني رايح شوفيني ماسكن يدتس..وماراح
ابعد الا يوم تقولين..طيب
رغد" ارتحت.. هزيت راسي بمعني"طيب":...........
الدكتور... صار يسالني اساله.. أي سنه انا فيها.. ووش اسمي..ووين انا
وكم عمري.. واساله كثير.. خلتني ابكي.. لان يماني عارفه لها جاوب
حاولت افكر.. بس وجعني راسي... ماقدرت...اسالته حيرتني...وسببت
لي ضيقه مب طبيعيه...رفعت نظري لسعود.. عرفت انه سعود..يوم
اسمع الكل يناديه بكذا": سعود
سعود" بلا شعور": عيونه
رغد"بخوف": قول لهم يطلعون..مااعرفهم.. مين هذول
سعود" استوعبت الموضوع كله ولفيت ع الطبيب": دكتور معقوله
الدكتور" هز راسه": ايو للاسف المدام عندها فقدان بالذاكرة
ام رائد" انهارت.. هي ماصدقت بنتها ترجع لها.. وبالنهايه تلاقي منها
الصد والخوف.. ابو رائد راح لعندها وحضنها.. وهون عليها بالكلام
وقال لها انه كلها يومين وتذكرهم..والطبيب طمنها بعد..طلب منا
نطلع ونخليها ترتاح.. بس هي دخلت بنوبة بكي...قربت منها خفت
عليها.. ومن بكائها.. شكلها كان طفله..ميته رعب.. من الي حولها
وهي ارتمت ع طول بحضني..": لاتروح ..قول لهم كلهم يطلعون بس
انت لا تروح
سعود" حضنتها..ومتناسي وجود عمي وعمتي ومشاعل...": ماني رايح
ابجلس هنا معتس...طيب
رغد"دفنت راسي بصدره":طيب

عطاها الطبيب مهدي.. وشوي الا راحت بالنوم.. بعدت عنها وماكان
ودي اقوم.. بس كنت ابي اتطمن واعرف وش السالفه...
سعود: الحين وش صاير
الدكتور: الضربه اثرت عليها ..ومن الارتجاج سبب فقدان للذاكرة
سعود: طيب هل هو مؤقت ولا شلون
الدكتور: والله مدري يااخ سعود.. بس بعد ماتهدى ومن بعد التحاليل
كل شئ راح يبان
سعود" مستغرب": طيب ليه مارضت لامها وابوها يقربون منها..
ليه انا بس وهي ماتذكر حد فينا
الدكتور: المريض يوم يكون بغيبوبه ...يحس بالي حوله.. وانا اشوف
السبب لانك كنت ملازمها طول الوقت واكثر صوت كانت تسمعه صوتك
فعشان كذا.. اتوقع حست بالامان.. مثل ماانتبهت انها كانت خايفه منك
انت بعد.. بص صوتك طمنها وحسسها بالراحه
سعود: طيب حالتها هذي لمتى.. تشوف امها وابوها متقطعين لقربها
يبون.. يتطمنون عليها
الدكتور: والله مدري .. كل حاجه بتبان مع الوقت...

مر اليوم كله عليها وهي نايمه.. وكانت فرصة عمتي لقربها..صارت
تبكي.. وتكلمها.. وهي ميتة شوق..لبنتها...طلعت وتركتها مع امها
وابوها .. ورحت اوصل مشاعل.. يالي كانت متضايقه بعد..
مشاعل:بتطول معها الحاله
سعود"ومركز ع السواقه": والله يااخوك مدري
مشاعل: والله انه عمتي ..وجعت قلبي وهي تبكي..كان ودها تحضنها
بس رغد مارضت...بالبدايه استنكرت الموقف بس يوم عرفت
انها فاقده الذاكرة.. هدى بالي شوي..كنت مشتاقه احضنها ..واتحمد
لها بالسلامه..بس هي ماعطتنا فرصه
سعود: مع الايام ان شاءالله تتحسن ..وبترجع رغد يالي تعرفونها
مشاعل: ان شاءالله.. والله اني ميتة شوق لها ..بس صدق ليه انت
بالذات رضت بقربه..
سعود" كنت مبسوط..والدنيا مو سايعتني للسبب هذا..حسيت اني
ملكت الدنيا كلها ..يوم مارضت الا بقربي.. حسيتا ني ارتويت..من بعد
عطش طوييل..هد حيلي..": مثل ماقال الطبيب.. يمكن لاني كنت
اكثر واحد تسمع صوته.. فعشان كذا .. صار يالي صار.. بس يوم
تهدى.. وتبدى تذكر .. راح تسمح لكم بقربها....
مشاعل: يارب ..انك ماتطول علينا.. وترجع رغد يالي نعرفها
سعود"من غيراقتناع بالدعوة.. لانه لو صارت..انا يالي راح اكون بمكانهم
جزء مني .. ماوده ترجع ذاكرتها.. لانه راح يرجع كرهها لي معه..وجزء
مني يبي ترجع.. يبيها ترجع بصحتها وسلامتها.. ترجع لامها وابوها
واخوها.. ترجع لبنتها.. حتى لو كانه.. ثمنه.. بعدي عنها...":امين

تو وصلت البيت وبطفي السيارة .. الا اشوف اتصال من المستشفى
خفت انه في شئ وبسرعه رديت: الو
الممرضه: الاستاذ سعود
سعود" بخوف": ايه معتس
الممرضه: ياليت تجي لعندنا بسرعه
سعود: ليه
الممرضه: المريضه .. صار معها حاله هيستريه وخوف..وموراضيه
لحد يقرب منها.. وتنادي عليك
سعود" سمعت انها تنادي على.. ع طول مشيت..بااسرع مافي
السيارة.. وصلت المستشفى.. وركضت ع غرفتها.. سمعت الازعاج
يالي طالع.. صوت عمتي ..تهدي فيها.. والكل يحاول يهدي فيها ..وهي
تصرخ.. وتطلب منهم يبعدون وتناديني..فتحت الباب بلا شعور... كان
كل همي.. اخليها تشوفني.. اخذها بحضني.. ماابي اسمعها تبكي.. ماابي
الخوف يالي بصوتها...شفتها.. وشلون واقفه بالزاويه..ومتكورة ع نفسها
وتبكي...اول مالمحتني.. فزت.. وجات ركض ورمت نفسها بحضني..
حضنتها..وودي دخلتها بصدري.. ابعدها عن الكل.. وتكون لي لحالي
ومافي حد يشاركني.. ودي شلت كل هالخوف منها..واحميها من الكل
ومن العالم كله..صرت امسح ع راسها": وش فيتس يارغد ليه هذا كله
رغد" بصوت مبحوح.. وبكي": ليه رحت عني.. ليه تركتني
سعود"ملكت الدنيا كلها من كلماتها..حضنتها اقوى لصدري..وهي
شدت اقوى...ومسحت ع راسها": ماتركت .. رحت اوصل مشاعل
تذكرين مشاعل صح..
رغد" وانا للحين دافنة وجهي بصدره.. حركت راسي": لا مااذكرها
وماابي اذكر احد.. وماابي اشوف احد.. طلعهم سعود.. مااعرفهم
ماابيهم .. الله يخليك بعدهم عني
سعود" رفعت راسي وناظرت عمي.. وبنبرة فهم على منها": عمي واللي
يسلم عمرك.. خذ عمتي.. وروحوا ارتاحوا.. ان شاءالله بعد ماترتاح..
وتهدى.. وانتم بعد تهدون.. كل شئ بيكون بخير..
ابو رائد" يمسك ام رائد": يلا مشينا
ام رائد" وصياحها يقطع القلب": ابي اجلس مع بنتي .. ماصدقت اشوفها
وهي صاحيه... ماشبعت منها ياابو رائد
ابو رائد" بحنيه": بنتك بخير.. وكلها كم يوم وترجع مثل قبل..الحين
احنا تطمنا عليها.. قومي.. قومي خليها ترتاح.. وقلبها يرتاح.. من
هالخوف..
ام رائد" تقوم" : وانا مو ذابحني الا خوفها مني.. تخاف من حضن امها
ابو رائد: ان شاءالله مايطول يالله مشينا .."ولف على": مااوصيك
ياسعود ع بنتي
سعود" وانا للحين حاضنها..وخجلت ع الوضع..وانا قدام عمي..تو انتبه
اني..مطيحن الميانه قدامه..": ان شاءالله لاتوصي حريص

طلعوا.. والدكتور معهم.. وصارت الغرفه لي ولها بس..كانت للحين
بحضني.. ودافنه راسها فيه..ومتمسكه بكل ..قوتها.. تمنيت الزمن
يوقف.. ع الحال هذا.. ماابي بعدها.. حبيت هالاحساس..وحبيت نظرة
الاحتياج.لي.. بعيونها..حبيت.. انها مارضت بقرب غيري..احساس
حلو بالحيل... يوم تكون محبوبتك..بين يديك.. ورافضه قرب العالم
كله.. وماتبي الا قربك.. بس قطعت تفكيري.. ورجعت لارض
الواقع.. لاتحلم كثير ياسعود.. كلها كم يوم وترجع ذاكرتها.. وتكون انت
بالجهه المرفوضه..": رغد
رغد:.....................
سعود" شلتها .. وهي ماقاومت..مشيت فيها للسرير.. وسدحتها...وكانت
للحين متمسكه بيدي..جيت بجلس ع الكرسي..مارضت...بعدت.وسوت
لي مكان..وانا مارديتها.. وماصدقت خبر.. اشتقت لنومتها بحضني
انسدحت.. جنبها.. وحطت راسها ع صدري.. وحضنتها..": مرتاحه
رغد" ماهمني أي شئ .. كل يالي همني انه مايبعد عني.. هو الانسان
الوحيد الي حسيت بالراحه والامان والدفا بحضنه.. ماابي يبعد عني..
مع اني مااعرفه ومااعرف من يكون..":ايه
سعود" بعد ماحسيت انها هدت من طريقه تنفسها ..صلحت جلستي
وبعدتها شوي وصرت مقابل وجهها": الحين انتي ماتعرفيني
رغد" هزيت براسي ": لا
سعود: طيب ليه..مارضيتي الا بقربي..
رغد"بحيرة": مدري..
سعود: طيب حاولي تتذكرين..
رغد"عقدت حواجبي.. لانه راسي وجعني وانا احاول": ماابي راسي
يوجعني
سعود"مسحت ع راسها": طيب اقول ل كانا مين
رغد: ايه
سعود: انا اصير زوجك
رغد"ارتحت للخبر .. لاني راحتي .. وحاجتي له ماكانت راحه اخت
لاخوها.. ولا احد من اقربها.. كانت حاجتي له حاجه بنت لحضن حبيبها
وزوجها.. شكلي كنت اموت عليه.. لاني مو قادرة ع فراقه..":صدق انت
زوجي
سعود: ايه
رغد: اها .. يمكن عشان كذا مارضيت لحد يقرب لي غيرك وماارتحت
لحد غيرك
سعود"كنت مبسوط من كلامها.. وصرت اشيل أي افكار تذكرني بالواقع
حتى لو كانت فترة مؤقته.. ابي اعيشها بقربها وحاجتها وحبها الكذوب
لي..": ايوا اتوقع كذا..مم طيب ماتبين تعرفين من كان هنا
رغد" بعدم اهتمام ": لا
سعود: ليه
رغد" بانزعج": مايهمني
سعود"ماحبيت اضايقها.. انا ماصدقت تصحى.. واشوفها تتكلم ..وتناظر
بعيونها ثاني":طيب.. انا جوعان.. وش رايك تتعشين معي
رغد" خفت انه يقوم ويبعد عني": لا لا ماابي.. لاتروح
سعود" ابتسمت.. لخوفها اني ابعد عنها": ماني رايح مكان العشاء
بيجي لعندنا..وش قلتي
رغد: لا مو مشتهيه
سعود"وانا ماكنت مشتهي.. بس يوم ناظرتها وشفت ضعفها..واصفرار
وجهها..قلت اباكل.. عشان تاكل.. هي وتصح": عشاني طيب
رغد"من غير أي تردد": طيب
سعود: وش ع بالك
رغد"بحيرة": مدري.. انا وش احب
سعود" كنت عارف وش تحب.. وش تكره.. مافاجاتني بسؤالها":ممم..طيب
الحين بطلب وتعرفين وش تحبين
رغد:طيب
سعود"اتصلت ع المطعم.. وطلبت منه يجيب صحن مقبلات ..وورق عنب
ولازانيا...وسيزلنغ دجاج... واتصلت ع المطعم الثاني.. وطلبت صحن
مشاوي...وورق عنب.. لانها تحب من المطعمين هذول..وعصير
كوكتيل..وطلبت من الممرضه انها تجيب كاسه عصير عشان تشربها
الحين ع مايوصل الطلب...قمت.. وهي رفضت قومتي.. بس طمنتها
اني بكون قربها.. كنت عارف رغد وشخصيتها.. وعارف انها ماتروق
وترتاح الا من بعد ماتاخذ لها شور.. مريح ودافي.. دخلت دورة المياه
"اكرمكم الله" وهي عيونها تراقبني.. وخايفه اطلع من الغرفه...جهزت
لها المويه..وعبيت البانيو..طلعت لها ومسكت يدها.. قلت لها تاخذ شور
سريع وماتطول.. ولا تقفل الباب .. واذا احتاجت شئ تناديني..ووريتها
كل شئ.. الشامبو .والجيل.. وكل شئ...طلعت .. ووقفت عند باب الحمام
بعد نص ساعه.. طلعت وهي لابسه الروب.. ولافه الفوطه ع راسها..
مديت لها .. البيجامه يالي عمتي جايبتها لها.. وقلت لها بنتظرها برا
عشان تغير.. بس استغربت من سؤالها
رغد"بحيرة": مو تقول زوجي.. ليه تطلع طيب
سعود" توهق": ايه زوجك.. بس انتي مو متعوده انك تغيرين قدامي
رغد" كنت خايفه انه يطلع.. وبخجل.. بس قاومته": طيب انت لف و
عطني ظهرك.. وانا بغير بسرعه.. بس لاتطلع
سعود" ضحكت ع شكلها.. كانت ميتة خجل..يالبى هالخجل الي ذبحني
وعلقني..وعرفت انها خايفه ابعد عنها": طيب
رغد" من بعد ماعطاني ظهره لبست بسرعه..":خلاص
سعود"لفيت عليها..وهي تجلس ع السرير..":نعيما
رغد"بخجل": الله ينعم عليك
سعود" جلست جنبها.. وخليت ظهرها ..بوجهي..وشلت الفوطه من راسها
وشعرها نزل..مثل الشلال ..ع ظهرها ..قربت راسي منه وشميته..
وحشتني ريحته..وملمسه..صرت اجففه..وهي ماقالت شئ...":.
رغد"بضحكه ذوبت قلبي... ضحكه اشتقت لها ودعيت ربي اني اسمعها
ثانيه": طيب ممكن تكمل جميلك وتمشطه
سعود" توهقت.. مااعرف امشط وخاف يوجعها طريقتي":بس مااعرف
رغد:عادي عادي
سعود: لا اخاف اوجعك وانا امشطه
رغد: ياسلاام للدرجه هذي شعري خشن
سعود" ضحكت ع طريقه كلامها":ههههههههههه لا مب كذا بس انتي
راسك مجروح اخاف اوجعك
رغد"بدلع طبيعي": عادي عندي احساس انك مستحيل توجعني او ترضى
لي بالوجع"ومسكت يدي بيدها الصغيرة..يالي كانت مزرقه من المغذيات
":صح
سعود"انعصر قلبي...خايف انها ترجع لها الذاكرة باي ثانيه..ويروح
كل هذا": اكيييد
رغد" تعطيني ظهرها": اجل خلاص
سعود"مسكت المشط.. وصرت امشط فيه..شعرها ماشاءالله تبارك الله
عليه..كان طويل.. بالحيل..خلصت..ورجعت لفيته ثانيه..عشان البرد
ومافي أي مجفف له..

وصل العشاء.. وجلسنا ناكل... انبسطت يوم شفتها تاكل..ومبسوطه..
كانت طبيعيه.. كم مره تمنيت.. اني اكون معها وهي بالحاله هذي
كنت احسد مشاعل.. واهلي.. يوم كانت تجلس معهم ..وتضحك
معهم.. وهذا ربي.. حققها لي.. حمدته وشكرته.. حتى لو كان ليوم
بس.. راضي..فيه..جلست ااكلها بيدي.. لحد ماشبعت..وهي تضحك
صارت تسوي مثلي وتاكلني بعد..كنت مبسووط من الوضع.. يالي حنا
فيه...
بعدها.. جلست معها ع السرير.. وصارت تسالني.. عن عمرها وكم صار
لنا متزوجين..هالجواب.. تعديته مدري ليه..بس صرت اقول لها عن
حياتنا بشكل سطحي...يعني عن مشاعل..امها امي..اخوها..وبنتها
يوم تكلمت عن جنى... فاجاتني بسؤالها
رغد" مبتسمه وبخجل": يعني صار لنا مده متزوجين..كم عمر بنتنا
سعود"حبيت هالكلمه..ماعرفت وش اقول لو قلت لا مب بنتنا بحيرها
واخاف انه يسبب لها انتكاسه او شئ:عمرها اربع سنين
رغد: يالله يعني صار لنها اربع سنين متزوجين"وبزعل":طيب ليه
مااذكر شئ منها
سعود: لانه صار معك حادث بسيط وبعدين اقولتس عليه..خلك تنسين
كل شئ
رغد"بحب": بس كل هذا ماخلاني انساك..او ع الاقل انسى اني ارتاح
لك واتطمن لك..وبخجل: شكلي كنت اموت عليك صح
سعود" بابتسامه..موجعه حاولت اخفيها عنها: ايه
رغد: وانت
سعود"مسكت يدها... وبستها": اموت ع التراب يالي تمشين فيه
رغد" بخجل.. ووجهها حمر":صدق
سعود: ايه صدق
رغد"رميت نفسي بحضنه.. احس اني مااشبع منه":طيب كلمني عنك
وعن حياتنا.. وعن بنتي
سعود"حضنتها.. وصرت اشم شعرها..غمضت عيوني..وانا اتهرب من
الاجابه":ممكن تخلين الاسئله بكرا.. انا الحين تعباان وميت نوم
رغد: لا اجلس شوي
سعود" وانا احرك اصبعي ع خشمها": ايه وش عليتس انتي نايمه لمدة
ثلاث اسابيع.. وانا الفقير.. النوم جافني ..
رغد"بحيا": اسفه
سعود" رفعت وجهها وبست جبينها": ليه الاسف
رغد: تعبتك معي
سعود"حضنتها وحطيت راسها ع صدري..وغمضت عيوني
وانا احمد ربي ع اللحظه هذي.. حتى لو كانت لليله بس":تعبك راحه
رغد"من غير تفكير":احبك
سعود"تجمدت..":.................................... ......